សូមចូលរួមអបអរសាទរដល់ខ្សែប្រយុទ្ធរបស់ Real Madrid កីឡាករ Karim Benzema ដែលបានឈ្នះពានរង្វាន់ Ballon d’Or លើកដំបូងក្នុងអាជីពរបស់ខ្លួន
Posted by Noah on October 18, 2022
ខ្សែប្រយុទ្ធសញ្ជាតិបារាំងរបស់អធិរាជReal Madrid កីឡាករ Karim Benzema បានជាប់ឈ្មោះជាម្ចាស់ពានរង្វាន់ Ballon D’or ឆ្នាំ២០២២ នេះ ក្រោយធ្វើបានល្អជាមួយក្រុម Real Madrid និងក្រុមជម្រើសជាតិបារាំង។
ខ្សែប្រយុទ្ធ Karim Benzema ក្នុងវ័យ៣៤ឆ្នាំ រកបាន ៤៤គ្រាប់ក្នុងការបង្ហាញខ្លួន៤៦ប្រកួតសម្រាប់ Real Madrid រដូវកាលមុន ដោយជួយឲ្យអធិរាជសលើកពាន La Liga និង UEFA Champions League។ ខ្សែប្រយុទ្ធសញ្ជាតិសេណេហ្កាល់ Sadio Mane បានត្រឹមលេខ២ ដោយ Kevin De Bruyne នៅលេខ៣ក្នុងបញ្ជី។Karim Benzema បាននិយាយឲ្យដឹងពីដំណើរជីវិតដ៏វែងឆ្ងាយនិងលំបាករបស់គេមុនទទួលបានពាននេះ ដោយនិយាយថា “នេះធ្វើឲ្យខ្ញុំមានមោទកភាពណាស់សម្រាប់អ្វីដែលខ្ញុំបានធ្វើ គឺខ្ញុំមិនដែលចុះចាញ់ឡើយ។ ខ្ញុំមាននិមិត្តរូប២រូប គឺ Zidane និង Ronaldo។ ខ្ញុំតែងតែមានក្តីស្រម៉ៃថាខ្ញុំនិងអាចធ្វើវាបាន។ ថ្វីត្បិតតែដំណើរមួយនេះមានបញ្ហាមួយចំនួន ខ្ញុំមិនដែលបោះបង់នោះឡើយ ដោយនៅតែបន្តធ្វើឲ្យបានល្អក្នុងការប្រកួត។ វាពិតជាលំបាកសម្រាប់ខ្ញុំ និងគ្រួសារ។ សម្រាប់ខ្ញុំ អាយុគ្រាន់ជាតួលេខ ព្រោះខ្ញុំនៅតែចង់បន្តលេងទៅមុខទៀត ហើយសង្ឃឹមថាខ្ញុំនិងអាចធ្វើឲ្យបានល្អបំផុត”។ Benzema បានក្លាយជាកីឡាករវ័យចំណាស់បំផុតដែលអាចឈ្នះ Ballon D’or ចាប់តាំងពី Stanley Matthews កាលពីឆ្នាំ១៩៥៦៕
